Maa Durga Ka Janam, Roop, Vahan, Navdurga, Chamatkar or Durga Chalisa – Ek Vishesh Kahani

Introduction-

Maa Durga ko hindu dharm mai shakti,suraksha or Dharm ki rakshika ke roop mai maana jata hai.jab kabhi paap ka vadh or dharm ki raksha ki avashyakta hoti hai,maa Durga apne bhakto ke raksha ke liye swayam prakat hoti hai.

Maa Durga Ka Janm – Ek Mahashakti Ki Utpatti

Ek samay tha jab dharti, swarg aur paataal — teeno jagah ek hi naam se kamp utha tha:

Mahishasur.

Ek bhainsa roopi asur, jise Brahma ji se aashirvaad mila tha ki na koi purush aur na hi koi devta uska vadh kar sakta hai.Is var ka galat fayda utha kar Mahishasur ne devlok par akraman kiya, Indra dev ko takhta chhoda diya, aur devta swarg se bhag gaye.

Sab devta ekatra hokar Brahma, Vishnu aur Mahadev ke paas gaye. Tab Brahma ji ne kaha,

“Iska ant sirf ek stree roop kar sakta hai — ek aisi shakti jo teenon lokon se pare ho.”Tab Vishnu ji ka chakra, Shivji ka trishul, Brahma ji ka kamandal — sab shaktiyon ka ek srot ban gaya.

Teeno devon ne apna tej mila kar ek roop rachna kiya – ek aisi roshni jismein se nikli ek apsamanya roop – Maa Durga.

Unki aankhen bijli si chamakti thi, das haathon me alag-alag devtaon ke shastra the, aur unka vahan tha ek bhayankar sher.Wahi Durga bani — Mahishasur ka vinash karne wali Mahashakti.

Jab Mahishasur ne maa Durga ko dekha, to pehle to usne unka mazaak udaya —”Ek stree mujhe kya haraayegi?”Lekin maa bas muskurayi…”Tu adharm hai… main dharm hoon. Tere paap ka ghada bhar chuka hai.

“Uske baad hua ek maha yuddh — 9 din tak, Durga aur Mahishasur ke beech.Har din, Mahishasur naye naye roop le kar maa ko dhokha dene ki koshish karta — kabhi bhainsa, kabhi purush, kabhi asur.Lekin Maa Durga ne sab roopon ka samna kiya.

10th din, maa ne apne trishul se Mahishasur ka vadh kar diya. Swarg me phir se shanti chha gayi.

Devtaon ne maa ko pranam kiya aur maa ne vachan diya:

“Jab bhi adharm badega, main aungi. Har yug me, har roop me.”

Maa Durga Ke Naam Aur Unka Arth

1. Durga

Arth: Jo “Durgam” hai — yaani jise paana mushkil hai.

Bhaav: “Ajeet” – Jo kabhi har nahi sakti. Rakhsha aur vijay ka roop.—

2. Bhavani

Arth: “Bhav” yaani Shiv ki patni.

Bhaav: Jeevan dene wali, srishti ki janani.—

3. Jagdamba / Jagat Janani

Arth: “Jag” yaani sansaar + “Amba” yaani maa

Bhaav: Puri srishti ki maa — sabko paalan karne wali.

4. Bhagwati

Arth: Bhagwan ke gunon se yukt — bhagwan ka stree roop

Bhaav: Param Shakti, sabhi devtaon se upar.—

5. Trinetra

Arth: Teen aankhon wali devi

Bhaav: Swarg, prithvi aur paataal — teenon lokon ko dekhne wali.—

6. Katyayani

Arth: Maharishi Katyayan ke yagna se prakat

Bhaav: Shakti ka shaant aur ghrina se bhara roop shatru nasht karne wali.

7. Chandraghanta

Arth: Jinke maathe par ardha chandra aur ghanta ho

Bhaav: Shaanti, sundarta aur sakriyata ka sangam.—

8. Mahagauri

Arth: Bahut hi gori, shuddh aur pavitra roop

Bhaav: Tapasya se prakashit roop, mangal aur safalta dene wali.—

9. Kali

Arth: Kaal ka samhaar karne wali

Bhaav: Bhay ko samapt karne wali krur roop — vinash ke liye prakat.—

10. Shooldharini

Arth: Trishul dharan karne wali

Bhaav: Shatruon ka vadh karne wali shakti.—

11. Adi Shakti

Arth: Sabhi shaktiyon ki mool roop

Bhaav: Srishti, palan aur sanhaar — teenon kriyaon ka ekatra roop.—

12. Ambika

Arth: Maa ka roop

Bhaav: Sneha, prem aur suraksha dene wali maa.—

13. Annapurna

Arth: Jo ann (bhojan) se bhare

Bhaav: Bhakton ko bhojan aur samriddhi dene wali roop.

14. Bhramari Devi

Arth: Bhramar (madhumakhi) roop

Bhaav: Chhoti chhoti roopon se bhi vinash karne wali shakti.

15. Simhavahini

Arth: Sher par savar

Bhaav: Sahas aur shaurya ka pratik roop.

Maa Durga Kis Ka Avataar Hai – Aadishakti Ki Amar Kahani

Brahmand ke aarambh me kewal ek hi urja thi — Aadishakti. Na devta the, na manav, na srishti. Bas ek shakti thi — prakash se bhari, nirakar, lekin sab kuch rachne wali.

Isi Aadishakti ne ek samay apna roop dharan kiya Sati ke roop me — jo Daksh ki putri thi. Unka prem bhagwan Shiv se hua, aur unhone unse vivah bhi kiya. Lekin jab Raja Daksh ne Shivji ka apmaan kiya, tab Sati ne swayam agni me pravesh kar apna deh tyag diya.

Shiv vikshep me chali gaye, srishti vyavastha hil gayi.

Lekin Aadishakti amar thi. Wah dubara janm leti hai Parvati ke roop me — Raja Himavan aur Rani Maina ki putri ban kar. Fir se vah Shiv ko apna pati banati hai, lekin iss baar wo kewal prem aur pativrata nahi — wo ek yoddha bhi thi.

Jab rakshason ka atyachar badhta hai, jab dharm ki rekha kamzor padti hai, tab wahi Parvati maa ban jaati hai Durga — ek aisi shakti jinke samne Mahishasur jaise daanav bhi kamp uthen.

Isiliye kaha jata hai “Durga hi Parvati hai, Parvati hi Sati hai, aur Sati hi Aadishakti hai.”

Maa Durga koi alag devi nahi, balki Aadishakti ka ugra roop hain — jab maa apne bhakton ki raksha ke liye yudh ka avataar leti hain.

Maa Durga Ka Vahan – Sher Ki Bhakti Aur Saahas Ki Kahani

Bachpan se maa Parvati ek hi sankalp lekar badi ho rahi thi — Shivji ko apna pati banana. Jab unhone yah thaan liya, to unhone Himalaya ke gahan van me kathor tapasya shuru ki. Na kuch khaana, na peena, na koi vastra — sirf pathar par baith kar Shivji ka dhyan.

Jungle ka mahaul bhayanak tha. Ek din ek sher unke samne aaya. Bhookh se paagal, vah kisi bhi samay maa Parvati ko apna shikaar bana sakta tha.

Lekin jaise hi us sher ne maa ki aankhon me dekha — ek shanti, ek tej, ek aisa prakash jisme uski saari bhookh aur krodh pighal gaye. Usne maa ke samne sir jhuka diya aur wahin unke paas baith gaya.

Tapasya ke dino me, jab thand padti, to vah maa ke paas ghoonsa maar kar unhe garam rakhta. Jab jangli janwar nazdeek aate, to unhe bhaga deta. Jab maa nishchint dhyan me hoti, to wah pehredaar banke khada rehta.

Maa ne is sher ki nishtha, seva aur suraksha bhavna se itni prabhavit hui ki jab unhone Durga roop dharan kiya tab us sher ko apna vahan bana liya.

Aaj bhi jab hum maa Durga ki murti dekhte hain, to unka sher humare liye sirf ek janwar nahi hota — woh bhakti, sahas aur seva ka pratik hota hai.

Maa Durga Ke Mata-Pita Aur Vivah – Ek Divya Milan Ki Kahani

Bahut samay pehle Himalaya parvat ke raja Himavan aur rani Maina ke ghar ek divya kanya ka janm hua. Woh bachpan se hi alaukik thi — shant, gyaani aur tejomayi. Mata Maina use “Parvati” kehkar bulati thi, kyunki woh Himalaya ke parvat se janmi thi.

Parantu maa Maina us kanya ke vishesh hone ka rahasya nahi jaanti thi — unki putri koi aur nahi, balki purv janm ki Sati, Aadishakti thi, jo punarjanm lekar prithvi par aayi thi. Unka ek hi lakshya tha — Shivji ko punah apna pati banana.

Parvati ne kathor tapasya shuru ki — barf se dhake pahadon par, ek pair par khade hokar, bina bhojan ke — bas Shivji ka dhyan. Unki tapasya se poora brahmand kamp utha. Shivji ne jab dekha ki yah kanya unki priya Sati ka roop hai, to unka hriday pighal gaya

Narad Muni ne Himavan aur Maina ko vishwas dilaya ki unki kanya koi saadharan ladki nahi, balki Aadishakti hai, jo Shiv ke liye hi janmi hai.

Aur tab hua ek alaukik vivah —Parvati aur Shivji ka divya sangam.Devta, rishi, muniyon aur grahon tak ne is vivah me apna yogdaan diya. Pushp barsaye gaye, veena baji, aur gagan me “Har Har Mahadev” ke naare goonj uthe.

Isi vivah ke baad, jab jab adharm badhta hai, tab maa Parvati Durga ka roop dharan karti hain — apne shant swabhav se bahar nikal kar ban jaati hain shakti ka saakar roop.

Maa Durga Aur Shiv-Parvati Ka Sambandh – Shakti Aur Shiv Ka Anant Milan

Ek samay ki baat hai, jab Himalaya ke parvat par Raja Himavan aur Rani Maina ke ghar ek sundar kanya ka janm hota hai — Parvati. Woh bachpan se hi shaant, prem bhari aur atyadhik gyaani thi. Parantu koi nahi jaanta tha ki yeh kanya koi aur nahi, balki purv janm ki Sati — Aadishakti — hai.

Jab Parvati badi hoti hai, to unka man kewal ek hi naam japta hai — Shiv. Unhone Shivji ko pati ke roop me paane ke liye kathor tapasya ki. Aur us tapasya ke fal swaroop, Shivji ne swayam Parvati ko apna jeevan saathi manaa.

Yeh milan sirf pati-patni ka nahi tha — yeh purush aur prakriti ka sangam tha. Shiv srishti ke niyam hai, aur Parvati us srishti ki shakti.

Lekin yeh kahani yahi nahi rukti…

Jab kabhi adharm badhta hai, jab kabhi asuron ka atyachar devlok aur prithvi par chha jaata hai, to wahi Parvati apna shaant roop tyag kar Durga ban jaati hain ek yodha devi, jo shastron se saja hoti hai aur har rakshas ka samhaar karti hai.

Parvati maa hai — sneha, prem aur sahara dene wali.

Durga shakti hai — raksha, yuddh aur nyaay karne wali.

Aur dono roop — ek hi Aadishakti ke — jo Shiv ki ardhangini hain.

Shiv bina shakti shav ke samaan hain, aur shakti bina Shiv adhura.Yeh sambandh kewal vivah ka nahi, yeh ek cosmic balance ka prateek hai.

Navratri Aur Maa Durga Ke 9 Roop – Ek Adhyatmik Yatra Ki Kahani

Ek samay ki baat hai…Jab Mahishasur jaise asuron ne dharti par apna terror phaila diya tha, devtaon ne Maa Aadishakti se prarthna ki. Maa ne kaha,”Main aungi, lekin har roop mein tumhein ek seekh bhi doongi.”

Tab Maa ne apne nau roopon me dharti par avtar liya. Har roop ek alag gyaan, ek alag shakti aur ek alag sankalp ka prateek bana. Isi divya leela ke sammaan mein Navratri ka utsav manaya jata hai.

1. Shailputri – Himalaya Ki Beti

Maa Parvati ka pratham roop. Woh Himalaya ke ghar janmi — prakriti, shuddhata aur himmat ka pratik.

Kahani: Jab maa Sati ne agni me deh tyag kiya aur punah Himalaya ke ghar janm liya — wahi bani Shailputri.

2. Brahmacharini – Tapasya Ka Roop

Maa ka doosra roop — jo kathor tapasya karke Shiv ko pati banati hain.

Kahani: Parvati ne bina bhojan, bina vastra, varsho tak tapasya ki. Yeh roop seekh deta hai — sahan karne ki shakti aur samarpan.

3. Chandraghanta – Shaanti Aur Sukha Ka Roop

Tisra roop jisme maa ke maathe par ardh-chandra hota hai, ghanta ki dhvani se bhay mitata hai.

Kahani: Maa ne asuron se raksha karne ke liye yeh roop dharan kiya — prem me shaanti, lekin anyay ke saamne veerta.

4. Kushmanda – Brahmand Ki Srishti Karne Wali

Chautha roop jisme maa ek muskan se pura brahmand rach deti hain.

Kahani: Jab kuch bhi nahi tha, andhkaar tha — maa ne ek haasi se prakash aur jeevan ki srishti ki.

5. Skandmata – Kartikeya Ki Maa

Paanchva roop, jahan maa ne devsena ke senapati Skanda (Kartikeya) ko janm diya.

Kahani: Maa apne bachhe ko apni godi me le kar bhi yodha bani, aur sansaar ko sikhaaya — maa hona sabse bada bal hai.

6. Katyayani – Vivah Aur Prem Ka Pratik

Chhatha roop — Maharishi Katyayan ke ghar janmi maa.

Kahani: Unhone Mahishasur ka vadh kiya aur kanya roop me prem aur veerta ka pramaan diya.

7. Kaalratri – Sankat Door Karne Wali

Saathva roop — sabse bhayankar, lekin bhakton ke liye kripa roop.

Kahani: Maa ne krur asuron ka vadh kiya, sab andhkaar ko khatm kiya. Yeh roop humein sikhata hai — andheron me bhi maa sath hoti hain.

8. Mahagauri – Shuddhata Aur Gyaan Ka Roop

Aathva roop — safed vastra, prakash aur pavitrata se bhara.

Kahani: Maa ne tapasya ke baad gauri roop dharan kiya yeh roop shuddhi, vishwas aur inner beauty ka pratik hai.

9. Siddhidatri – Siddhiyan Dene Wali Maa

Nauva roop — maa jo sabhi siddhiyan, gyaan aur kripa dene wali hain.

Kahani: Jab sab kuch prapt ho jaye, ant me maa ke darshan milte hain — yah roop anant samriddhi ka pratik hai.

Maa Durga Ki Priya Mithai Aur Pushp

Priya mithai: Malpua, Kheer, Nariyal Barfi, Besan ke laddoo

Priya phool: Kamal ka phool

Maa Durga Ke Chamatkar – Bhakti Se Bhare Sachche Prasang

Maa Durga sirf ek devi nahi, ek jeevit shakti hain. Jab bhakt sache prem, shraddha aur samarpan ke saath maa ko yaad karte hain, tab maa apna roop dharan karke unke jeevan me chamatkar kar jaati hain.

Yeh kahani hai Ramesh naam ke ek bhakt ki, jo ek chhote gaon me rehta tha. Uski zindagi dukhon se bhari thi —Maa ki tabiyat hamesha kharab rehtiUski patni ko santan nahi ho rahi thiGhar me karz ka pahaad thaDushman uske vyapar ko barbaad karne me lage the

Ek Navratri, Ramesh ne sankalp liya —”Main maa ke samne 9 din ka vrat rakhunga, aur har din unki aarti aur Durga Chalisa ka paath karunga.”

Har din maa ke 9 roopon ki pooja hui. Har din usne apna dukh maa ke charanon me rakh diya.

Aur phir hua chamatkar..

4th din, uski maa ka purana rog bina dawai ke theek hone laga

6th din, doctor ne uski patni ko bataya ki wo maa banne wali hai

7th din, ek purana udhaar waapas aa gaya aur ghar me paisa aa gaya

8th din, uske dushman ka vyapar khud band ho gaya

9th din, maa ne sapne me darshan diye — ek roshni se bhare roop me — aur kaha:”Beta, teri shraddha ne mujhe kheench liya. Main sadaa tere saath hoon.

“Us din se Ramesh ka jeevan badal gaya. Aaj bhi wo maa ke mandir me seva karta hai, aur har Navratri 9 logon ko bhog khilata hai.

Maa Durga Ke Chamatkaron Ke Pramukh Roop

Rogon se mukti: Maa ki kripa se asadhya rog bhi jaate hain

Santan sukh: Be-santan jode maa ke vrat se santan prapt karte hain

Dhan aur samriddhi: Maa Lakshmi ka roop bhi Maa Durga me samaya hai

Shatruon se raksha: Dushman khud peeche hat jaate hain

Achaanak dhan prapti: Jab aasha chhoot jaye, tab maa apna haath badhati hain

Manokamnaon ki poorti: Jo sacha bhakt hai, uski har iccha maa poorti karti hain

Swayam darshan dena: Kabhi sapne me, kabhi jaagte huye — maa darshan bhi deti hain

Maa Durga Ke 10 Pramukh Mandir Aur Unke Sthaan

1. Vaishno Devi Mandir – Jammu & Kashmir

Sthaan: Trikuta Parvat, Katra

Vishesh: Maa ke teen swaroop — Mahakali, Mahalakshmi, Mahasaraswati ke darshan ek hi gufa me

2. Kamakhya Devi Mandir – Assam

Sthaan: Nilachal Parvat, Guwahati

Vishesh: Maa Kamakhya tantra sadhna aur shakti upasana ka mukhya kendra, ek Shaktipeeth bhi hai—

3. Jwala Devi Mandir – Himachal Pradesh

Sthaan: Kangra district

Vishesh: Yahaan maa ke darshan agni ke roop me hote hain — 9 jyotiyan sadha jalti hain bina tel ke

4. Naina Devi Mandir – Himachal Pradesh

Sthaan: Bilaspur district

Vishesh: Maa Sati ke netra yahaan gire the, isi wajah se ise “Naina Devi” kaha gaya

5. Chintpurni Devi Mandir – Himachal Pradesh

Sthaan: Una district

Vishesh: Maa ko chinta door karne wali devi ke roop me pooja jata hai

6. Dakshineswar Kali Mandir – West Bengal

Sthaan: Kolkata ke paas Hooghly nadi ke kinare

Vishesh: Maa Kali ka prasiddh roop, yeh mandir Ramakrishna Paramhansa se juda hai—

7. Kalighat Kali Mandir – Kolkata

Sthaan: Kalighat, Kolkata

Vishesh: 51 Shaktipeethon me se ek, yahaan maa ka dakshin roop poojit hai

8. Ambaji Mandir – Gujarat

Sthaan: Banaskantha district

Vishesh: Maa Amba ka mandir, yatra me sabse jyada shraddhalu yahaan aate hain

9. Chamunda Devi Mandir – Himachal Pradesh

Sthaan: Palampur ke paas

Vishesh: Maa Chamunda ka bhayankar roop, rakshas Chamunda ka vadh yahaan hua tha—

10. Maihar Devi Mandir – Madhya Pradesh

Sthaan: Satna district

Vishesh: Maa Sharda ke roop me poojit, 1063 seediyaan chadh kar maa ke darshan hote hain

Durga Vrat Aur Aastha – Maa Ki Bhakti Se Jeevan Sudharne Ki Kahani

Jab jeevan me sab kuch ruk jaye — na sehat bachi ho, na sukh-shanti, na paisa — tab ek hi sahara bacha rehta hai: Maa Durga ka vrat aur aastha.

Yeh kahani hai Kavita naam ki ek working woman ki. Zindagi bhaag rahi thi, lekin andar se khokhlaapan tha

Sharirik thakan

Mental stress

Financial pressure

Aur ghar me aksar kalah

Usne ek din apni nani maa ko maa Durga ka naam lete hue suna. Nani boli:”Navratri aane wala hai beta, maa ke 9 din ke vrat rakh le, sab kuch badal jaayega.”

Navratri Mein 9 Din Ka Vrat – Naye Jeevan Ka Aarambh

Kavita ne pehla kadam uthaya — Navratri ke 9 din ka vrat.Har din maa ke alag roop ki pooja, satvik bhojan, aur mann se ki gayi aarti.

Niyam:

Brahmacharya ka paalan

Masaledar, non-veg, onion-garlic se doori

Subah aur shaam pooja aur Chalisa paath

Usne mehsoos kiya — uska mann shaant ho raha hai, raat ko neend aane lagi hai, aur wajah ke stress lines dheere dheere gaayab ho rahi hain.

Masik Durga Ashtami Vrat – Har Mahine Maa Ka Ashirwad

Navratri ke baad usne har mahine Durga Ashtami vrat rakhna shuru kiya —Shukla paksh ki Ashtami tithi ko vrat, maa Mahagauri ki pooja aur kanya bhojan.

Kamaal ka parinaam:

Ghar me pehli baar bina wajah ki muskurahat aayi

Mann me sukoon aur jeevan me gati

Mahagauri Ki Pooja – Aarogya Aur Shuddhi Ka Vardan

Mahagauri maa ki pooja karne se Kavita ko apne shareer aur mann dono me prakash mahsoos hone laga.

Woh kehti hai:

“Jaise meri puri body detox ho gayi ho. Main fir se jeena seekh rahi hoon.”

Aastha Ka Matlab Kya Hai?

Aastha ka matlab sirf vrat rakhna nahi, mann se maa ko samarpit hona hai.

Jab aap maa se baat karte ho

Jab aap unke liye phool chadhate ho

Jab aap unke darshan me aankh bandh kar lete ho — wahi sachchi aastha hai

Shri Durga Chalisa Sampurna

Namo Namo Durge Sukh Karni

Namo Namo Durge Dukh Harni.

Nirakar hai jyoti tumhaari,

Tihun lok phaili ujyaari.

Shashi lalat mukh maha vishaala,

Netra lal bhrrkuti vikraala.

Roop maat ko adhik suhaave,

Daras karat jan ati sukh paave.

Tum sansaar shakti le kinaa,

Palank hetu ann dhan dinaa.

Annapurna hui jag paala,

Tumhi adi sundari baala.

Pralay kaal sab naashan haari,

Tum Gauri Shivshankar pyaari.

Shiv yogi tumhare gun gaavein,

Brahma Vishnu tumhe dhyavein.

Roop Saraswati ko tum dhaara,

De subuddhi rishi muni ubaara.

Dharayo roop Narsingh ko Amba,

Pargat bhayi faadkar khamba.

Raksha kari Prahlad bachaayo,

Hiranyakashipu ko swarg pathaayo.

Lakshmi roop dharo jag maahi,

Shree Narayan ang samaahi.

Ksheer sindhu me karat vilaasa,

Dayaa sindhu deeje mann aasa.

Hinglaj me tumhi Bhavaani,

Mahima amit na jaat bakhaani.

Matangi aur Dhoomavati Maata,

Bhuvaneshwari Bagla sukh daata.

Shree Bhairav Taraa Jagtaarani,

Chhinna Bhala bhav dukh nivarani.

Kehri vaahan sohe Bhavaani,

Langur veer chalat agwaani.

Kar me khappar khadg viraaje,

Jako dekh kaal dar bhaaje.

Sohe astra aur trishoola,

Jaate uthat shatru hiya shoola.

Nagarkot me tumhi virajat,

Tihun lok me danka baajat.

Shumbh Nishumbh dainav tum maare,

Raktbeej shankhan samhaare.

Mahishasur nrip ati abhimaani,

Jehi agh bhaar mahi akulaani.

Roop karal kaalikaa dhaara,

Sena sahit tum tihi sanhaara.

Parey gaanth santan par jab jab,

Bhai sahaay maat tum tab tab.

Amar puri aur baasav loka,

Tab mahimaa sab rahe ashoka.

Jwaala me hai jyoti tumhaari,

Tumhe sada poojen nar naari.

Prem bhakti se jo yash gaave,

Dukh daaridra nikat nahi aave.

Dhyave tumhe jo nar man laayi,

Janm maran taako chhoot jaayi.

Jogi sur muni kahat pukari,

Yog na ho bin shakti tumhaari.

Shankar aacharya tap keenho,

Kaam krodh jeet sab leeno.

Nishidin dhyaan dharo Shankar ko,

Kahu kaal nahi sumiro tumko.

Shakti roop ka maram na paayo,

Shakti gayi tab man pachhtaayo.

Sharnagat hui kirti bakhaani,

Jai Jai Jai Jagdamb Bhavaani.

Bhai prasanna aadi Jagdambe,

Dai shakti nahi keen vilambe.

Moko Maatu kasht ati ghero,

Tum bin kaun harey dukh mero.

Aasha trishna nipat sataavein,

Ripumurkha mohi darpavein.

Shatru naash kijai Maharani,

Sumiron ichchhit tumhe Bhavaani.

Karo kripa hey Maatu dayaala,

Riddhi siddhi de karahu nihaala.

Jab lagi jiyoon daya phal paaoon,

Tumharo yash main sada sunaaoon.

Durga Chalisa jo koi gaave,

Sab sukh bhog param pad paave.

Devidas sharan nij jaani,

Karo kripa Jagdamb Bhavaani.

॥ Shri Durga Chalisa Sampurn ॥

Conclusion

Maa Durga ke charanon mein shraddha se prarthna karne par har sankat door ho jata hai. Unki upaasna se bhakton ko shakti, sahas aur safalta milti hai. Maa Durga sirf ek devi nahi, balki ek jeevan shakti hain jo andhakaar mein bhi prakash deti hain.

Agar aapko ye blog acha laga ho, to kripya ise share karein aur apni bhavnaayein comment me likhna na bhoolein — Maa Durga sabki manokamna poori karein!